فنجان قهوة مع دولة الرئيس: فرح والباص السريع


وكالة الجزيرة للأنباء -- فارس كرامة

في فنجان قهوة جديد مع دولة الرئيس شو رأيك تودي فرح رحلة بالباص السريع وتعطينا ملخص للوضع، عنا اليوم ملفين بدهم وقفة جدية، إعلام الحكومة وحضورها الرقمي، والباص السريع اللي كان المفروض يكون حل لأزمة النقل، لكنه بأوقات الذروة صار جزء من المشكلة.

يا دولة الرئيس، وين فرح، الناطق الرقمي باسم الحكومة، إلها فترة غايبة عن المشهد، ولعل المانع خير، ولا ما في مواضيع تحكي فيها، معقول وزير الإعلام مبسوط على غيابها، ولا خايف توخذ الجو منه، الحكومة احتفت بنموذج فرح وباستخدام الذكاء الاصطناعي بالتواصل مع المواطنين، لكن اليوم في غياب واضح، وكأن التجربة كانت حملة إعلامية وانتهت، مش مشروع لازم يستمر ويتطور، فهل فرح أخذت إجازة مفتوحة، ولا في خطة لإعادة تفعيلها؟

ومن الإعلام للنقل، يا دولة الرئيس، معقول وزارة النقل ما بتعمل جولات ميدانية على الباص السريع بأوقات الدوام والترويحة، حتى تشوف بعينها معاناة الناس؟ الوضع ببعض الخطوط صار كارثي، الحافلات مكتظة والركاب فوق بعض ولاصقين ببعض بصورة غير طبيعية، والمواطن أحيانا بستنى نص ساعة حتى يقدر يركب، لأن الباصات بتوصل معبّاية وما فيها مجال تحمل ركاب زيادة، وهذا كله موثق بالصور والفيديوهات.

الأزمة أوضح ما تكون على خط 100، من المحطة للجامعة الأردنية، خصوصا وقت دوام الجامعة، وهون السؤال لوزارة النقل، هل المشكلة بسوء إدارة الخطوط ومواعيد تسيير الحافلات، ولا بنقص أعدادها، ومين براقب حجم الطلب بأوقات الذروة.

يا دولة الرئيس، الباص السريع وعد المواطن والموظف والطالب إنه يختصر عليهم الوقت ويوصلهم أسرع، والمطلوب اليوم زيادة عدد الحافلات وتنظيم مواعيدها، حتى ما يتحول مشروع أخذ ثقة الناس لمعاناة يومية جديدة، خصوصا إنه منفذ أساسي لكثير من المواطنين بظل الأزمات المرورية الصباحية.

والحل لأزمة السير مش بس بتوسعة الشوارع، الحل بمنظومة نقل عام قادرة تستوعب الناس، لما المواطن يضمن باص منتظم ويوصل بوقت معقول، رح يترك سيارته ويركب الباص، أما إذا ظل يستنى نص ساعة حتى يقدر يصعد، فلا تطلبوا منه يساهم بتخفيف الأزمة.

باختصار يا دولة الرئيس، فرح بدها ترجع تحكي مع الناس، والباص السريع بده يرجع يخدم الناس، ووزارة النقل مطالبة تنزل للميدان وتشوف الخلل، لأن نجاح المشاريع مش بالإعلان عنها، بل بمتابعة تفاصيلها والتأكد إنها بتخدم المواطن.





عدد المشاهدات : (2)

تعليقات القراء

لا يوجد تعليقات


أكتب تعليقا

لن ينشر أي تعليق يتضمن اسماء اية شخصية او يتناول اثارة للنعرات الطائفية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار وكالة الجزيرة للأنباء علما ان التعليقات تعبر عن راي اصحابها فقط.
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :